Kvöldsagan 30.ágúst til 1.sept. FARKENNARINN eftir Ólaf Jóhann Sigurðsson

Undanfarnin kvöld hefur verið endurflutt í RÚV á rás 1, smásagan FARKENNARINN eftir Ólaf Jóhann Sigurðsson rithöfund.

Þessi upptaka er frá árinu 1971 í flutningi Þorsteins Gunnarssonar leikara. 

Líkt og aðrar sögur Ólafs Jóhanns eru persónulýsingar þessarrar sögu einstaklegar skýrar og velunnar. Lesturinn er eins og hann getur bestur orðið.

Hægt er að hlusta á upplesturinn á ruv.is.

MÁLÞINGIÐ Á DAGSKRÁ RÚV

Málþingið um Ólaf Jóhann Sigurðsson var tekið upp í heilu lagi bæði á segulband og myndband.

RÚV annaðist upptökur á töluðu máli. Nú er efnið komið með ákveðinn útsendingartíma á rás 1. Dagskráin að Torfastöðum verður þriðjudaginn 10. ágúst kl. 20:30 en dagskráin að Borg verður á sama tíma viku síðar eða 17. ágúst.

Hollvinir Grímsness eru afar þakklátir RÚV fyrir viðurkenninguna sem það sýnir dagskrá félagsins með upptöku og flutningi efnis frá hátíð þess. En auk upptöku á erindum á málþinginu annaðist RÚV einnig  upptöku á  dagskránni að laugardeginum, Islensk Menning. Hver veit nema eitthvað af því efni muni heyrast á RÚV í haust. Félagið þakkar starfsmönnunum frá RÚV, Gunnari Stefánssyni dagskrágerðarmanni og Ólafi Thoroddsen tæknimanni, fyrir framlag þeirra./GG

P.s. Hægt er að hlusta á flutninginn á vef RÚV með því að velja dags- og tímasetninguna.

BRÚ TIL BORGAR 2010

Aðsóknarmet var slegið að dagskrárliðum BRÚAR TIL BORGAR  2010 sem haldin var helgina 10.- 11. júlí sl. sem að þessu sinni fóru eingöngu fram innan dyra.

Að laugardeginum var troðfullt út úr dyrum í Gömlu Borg. Var auðfundið á aðsókninni og undirtektum gesta að áhugi fer vaxandi á að fræðast um og njóta þess sem íslensk menning stendur fyrir.

Vel á annað hundrað manns mætti á sunnudagsmorguninn að Torfastöðum og naut þar að geta horft til staða í landslaginu sem nefndir voru í erindum og ljóðaflutningi ræðumanna er fluttu efni um og frá uppvaxtarárum Ólafs Jóhanns Sigurðssonar rithöfundar frá Torfastöðum í Grafningi.

Í hádeginu var Grafnings-kjötsúpa snædd í Þrastalundi á leiðinni til Félagsheimilisins að Borg.

Þegar inn var komið í Félagsheimilið blasti við augum gesta mikil og vönduð sýning um Ólaf Jóhann Sigurðsson, verkum hans ásamt flutningi á efni í eigu RÚV.

Með naumindum tókst að koma öllum gestum fyrir í Félagsheimilinu er dagskráin hélt þar áfram. Flutningur erinda var stuttur, fróðlegur, skemmtilegur og einkarvel fluttur. Kammerkórinn skilaði tónlistarþættinum með glæsibrag. Lokalag kórsins var frumflutningur á "Augun bláu" eftir Örlyg Benediktsson sem samið er við eina ástarljóð Ólafs Jóhanns Sigurðssonar til konu sinnar sem varðveist hefur.

Í dagskrálok ávarpaði Gunnar Þorgeirsson, oddviti Grímsness og Grafningshrepps, gesti og þakkaði Hollvinum Grímsness fyrir hátíðina. Lauk hann ávarpinu með því að tilkynna um þau áform sveitarstjórnarinnar að hefja þegar á næstunni könnun á möguleika að sveitarfélagið reisi menningarsetur að Borg á næstu árum. Vöktu þessi orð oddvitans verðskuldaða athygli.

Greinilegt er að hátíð Hollvina Grímsness, BRÚ TIL BORGAR, hefur skipað sér sess í hugum margra þar sem fastagestum fer fjölgandi með hverri hátíð.

Gerist Hollvinir Grímsness

Þeir sem hug hafa  á að gerast félagar í Hollvinum Grímsness eru beðnir um að skrifa umsókn inn í "gestabók" sem er í flokknum "Efni" á forsíðunni eða hafa samband við einhver eftirtalinna:

Guðmundur Guðmundsson   s.899 3267      netfang           [e-mail]

Laufey Böðvarsdóttir            s. 663 0163   netfang             [e-mail]

Einnig eru þeir sem hafa tekið góðar myndir úr starfi HG beðnir um að senda þær til ofangreindra stjórnarmanna til að hægt sé að bæta þeim í safnið.